保皇黨主腦、民記主席譚耀宗噚日喺立法會內會，話因為下周三10幾個建制派議員「有活動」，希望立法會大會提早8點鐘結束，但又唔肯公開究竟乜活動咁重要，結果惹來泛民炮轟。社民連「長毛」就質疑，如果立法會可因個私人活動提早完會，第日係咪可以學人大政協咁，一年至開一次會？公民黨毛孟靜都話，過去泛民曾話6月4日時提早少少完會，等議員去維園悼念，但建制派都反對，現時竟因不知名活動，就要提早完會，實在好荒謬。
保皇派議員則死撐譚耀宗，經民聯盧偉國話8點完會可以令議員「好多晚上活動都可以參與，係好事」，保險界陳健波聲稱呢個係「同民生一個好重要的會議」。但據八方得知，呢個其實只係財爺喺酒樓搞嘅飯敍，都係聽聽預算案建議，絕非乜嘢正式「會議」。最終內會主席梁君彥決定拋番個波畀曾鈺成，話由大會主席決定。