太古城一個單位連天台（200呎）以一千萬元售出，實用呎價高達17,182元，建築呎價14,815元，實用面積有582呎，內有兩房，即是每間房要五百萬元。因金管局嚴限按揭，買家最多只可借款五百萬元，於是首期高達五百萬元，此外還有印花稅、律師費、經紀佣金……這兩個睡房可謂價值不菲。
建築675呎，實用582呎只是中小單位，適合兩人至三人居住，因位於市區，叫到天價，怪不得今天的年輕人只能希望買入一個實呎150的新界上車盤。
此日與銀行見習生Y講未來希望，佢就話：「點會有希望，唔跟阿爸阿媽住，住去邊？」見習生Y係大學經濟系畢業，月薪不夠16K，叫做好過14K一啲，與父母同住唔使交租，扣除薪俸稅、交通費、中環食用等等，之後，每月死慳死抵希望儲蓄五千，但不知儲到何年何月，先至夠買樓首期，樓價升幅恒常高於薪水升幅，怎麼辦？諗番轉頭，1992年之時，經濟畢業生到銀行做trainee，月薪有一萬二千元，當年沙田第一城600呎（左右）單位售價約百幾萬，22年後，見習生Y月薪未夠一萬六千元，但沙田第一城600呎單位已升到530萬，點追呀。不想猶自可，想起就心灰。見習生Y話：「同學最希望考到做紀律部隊，日前懲教署請人，月薪三萬幾，年年例牌跟公務員大隊加薪百分之四至五，即每年加薪千幾銀，我就每年加薪四至六百元，我啲文科理科社會科學院同學都躍躍欲試，博一博喎。我就希望能夠成為你筆下嘅賓架X，但不知等到何年何月，你有乜好意見俾我？」真難講，自己當年好似又幾順風順水，讀完大學至今，未曾認真捱過（當年算命先生批左丁山「早年捱到21歲後就會一片順流」），入咗銀行界後，第一份工做七年，之後就轉工又轉工又轉工，卒之一事無成，幸好生活不愁。以此話俾見習生Y聽，點知會唔會啱聽適用呀，時勢都唔同晒咯，做到非警察紀律部隊係幾好搵㗎。於是同見習生Y講：「留在銀行工作幾年，乜嘢銀行財務資格字母都考齊，累積工作經驗之後，先至吼機會行事，自己打好咗根基，先至能良禽擇木而棲，暫時唔好為咗多一兩千蚊薪水而轉職呀！」見習生Y哦哦幾聲而去，跟住收到教師M嘅電話，佢話個仔在碧科會計師樓已考到CPA，但日日做到三更半夜，了無人生樂趣，問左丁山可唔可以幫佢個仔轉工。呢類故事聽得多咯，只能苦笑。