歐霸盃周四完成埋最後一輪分組賽，其中C組榜首大戰，由比錫達斯主場對熱刺，比賽兩度因照明系統故障中斷（上圖）；比軍就靠辛克杜辛一箭定江山，1:0小勝熱刺，壓過對手首名出線。熱刺就要陪利物浦齊齊列入非種籽球隊。
賽前熱刺領先比軍2分，今仗不敗就可首名，領隊普捷天奴用兵都較之前有誠意，查迪尼、卡保奧等主力都正選，不過開波8分鐘球場就突然黑晒，原本照明系統有問題，搞咗16分鐘比賽開番，但都捱唔到尾，喺完場前又壞過。主隊就趁「黑」打劫，靠辛克杜辛一箭定江山勝出，搶埋個榜首位添。
歐聯就德甲盛世，嚟到歐霸盃就係意甲盛世，今屆4支參與分組賽球隊都順利取得出線權，連埋由歐聯降格嘅羅馬，32強總共有5支意甲兵，當中國際米蘭、拿玻里同費倫天拿更被列為種籽球隊，周一進行抽籤，就會知道對邊啲非種籽球隊，不過賽制下唔會對番同組及同國家球隊，即係國米32強唔會對到羅馬。
識睇，一定係睇足英台【英波Live】：
http://soccer.appledaily.com
http://bit.ly/engballlive