俾通訊局下令辭職嘅亞視前執董盛品儒，繼本周初法庭下令要佢同堂兄、即係亞視主要投資者王征一齊孭番亞視俾通訊局罰嗰100萬元後，前日又俾人告上法庭。曾經受盛生委聘嘅律師行前日入稟高院，話幫佢做咗嘢，喺2012年2月至2013年11月出咗四張律師費賬單畀佢，總數359萬元，但係盛生只係畀咗174萬元，之後問極都唔肯畀，所以追餘款185萬元。
八方翻查資料，發現追數嘅蘇姜葉冼律師行，喺亞視董事蔡紹中告盛品儒，要求查亞視數單案，就係代表盛生。當時盛生反對蔡紹中查數，2011年9月敗訴，跟住之後嗰年6月上訴都輸埋。雖然律師行冇喺入稟狀講啲律師費源自邊單案，但睇番出單嘅日期，好大機會就係呢單。盛生上月至結婚沖喜，唔知受唔受得住呢個禮拜接連打擊呢？