【維基開戰之 遇上伯樂】雨傘運動告一段落，但已開花結果，而香港電視劇集《選戰》的劇情，多番揭示政治黑材料，又有影射多位香港政界人物之嫌，題材敏感。出身無綫的《選》劇總導演黃國強跟弟弟偉強，日前接受本報專訪時說：「如果喺TVB攞《選戰》出嚟等於撼頭埋牆！」更指在香港很難找到老闆願意開拍，證明千里馬都要有伯樂扶持。
撰文：嵐山
近月香港人努力爭取一人一票真普選，雨傘運動遍地開花，港視開台劇《選戰》食正條水，成話題之作，背後功臣是黃國強（KK）和黃偉強（Benny）兩兄弟，大哥KK做總導演，與負責編劇的細佬Benny三年前開始構思這場特首選戰。
故事背景設定為2022年，港人終於落實一人一票選特首，劇中有不少與香港政界人物熟口熟面的角色，如廖啟智飾演的宋漫山被指似曾鈺成和梁振英的混合體，曾偉權飾演的陸偉陶遇上桃色事件，在唐英年身上亦曾發生，Benny直言難以避免：「好容易會似，呢啲係戲劇上嘅鋪排。其實我係政治半盲，王生（王維基）就提議可以幫我哋搵任何一個黨派做訪問，話乜嘢人都可以搵到。但我哋商量過後，反而擔心被人游說佢哋嘅政治理念，最終只透過朋友接觸較低層嘅政治助理。但了解越多，先發覺呢個政治體系咁唔公道，成個立法會係一面倒俾人把持住，行會又俾一個人控制，你開始明白點解有人要拉布，某程度上創作都有一啲申訴。」
劇情大膽談及中方
劇中還揭示好多政治黑材料，李心潔飾演的葉晴為爭取入閘選票連良心都出賣，曾偉權欲退選卻被中方人員阻撓，Benny強調是「道聽塗說」，撰寫時抱住戰戰兢兢心情：「記得有一次問王生危唔危險，提及中方會點？佢話如果你覺得係事實就寫，反問唔講唔提係咪唔真實？只要唔好詆毀就得。」
KK和Benny雖不是熱血青年，但亦曾落佔領區實地採訪，KK說：「我哋有拍到一啲片段，但如果有機會拍《選戰》第二輯都未必用得上，因為Benny喺雨傘運動初期已經寫好劇本，並冇加入呢個元素。如果反應好好，有機會拍第三輯，咁就冇理由再迴避。」Benny最近寫了另一個新劇本暫名《一級警號》，當中涉及警察內部權鬥，他說：「雨傘運動嘅四年後換咗政府，示威運動會唔會重蹈覆轍呢？示威運動背後就成為呢班警察嘅鬥爭工具，不過我哋係drama，唔係講政治。」
欣賞王維基敢創新
王維基的網上電視能否持續仍屬未知之數，兩兄弟完成手頭上《選戰》後期便約滿，前景未明，但兩人仍無悔離開工作20年的無綫，因為KK相信這類政治敏感的題材，除了王維基，在香港很難再找到老闆願意開拍，他解釋：「我喺TVB浸淫咗10幾20年，知道有啲題材一定過唔到，如果攞《選戰》出嚟等於撼頭埋牆。因為你要招呼好多中層人員，佢哋好多都係8、90年代威過，覺得你𡃁仔邊識吖，好難喺咁嘅土壤環境有第二啲嘢走出嚟，所以好多人詬病TVB劇係千篇一律。」相反港視冇中層，所有創作只直接向王維基匯報，即使老闆不喜歡，最終亦用民意定生死，他說：「好似《惡毒老人同盟》試拍咗一集，老闆唔鍾意，佢就攞畀第二組同事睇，大家都覺得幾好笑。拗完一輪老闆就話，既然得我咁特別唔識笑，咁就開拍啦！」王維基勇於冒險創新的精神，令KK學到更多，他續說：「佢開放自由畀你，反省後發現某啲框框要自己打破，呢3年其實有價值。我相信每一個從業員都希望有多一間電視台，多啲生存空間同創作平台畀大家發揮。」
12月15號要記低
See See TVB．Bloody最威
http://hk.apple.nextmedia.com/tvbloody