早幾日見報道話地獄球場傷咗幾個人，八卦嘅我當然要親自走去睇吓啦，去到九龍灣竟然見到一位英國嘅老朋友，年青一代球迷可能連佢個名都未聽過，佢就係1991年嚟香港，先後踢過星島同愉園等球會嘅約翰摩亞。
打完招呼先攞料係我慣常嘅做法，佢話識做識做，老摩話睇完阿仙奴場歐聯（圖）大勝加拉塔沙雷後，成隊兵工廠都返晒嚟，雲格更加話好開心見到隊波打法咁有侵略性，中場艾朗藍斯回勇（編按：今仗因傷缺陣），仲入咗球世界波，咩信心都有晒，今晚對紐卡素入球「大」有1.59倍算唔錯。我聽完又加埋自己嘅心水，德甲榜首大戰奧格斯堡對拜仁慕尼黑入球「大」，都有1.57倍乘埋有2.5倍，粗粗地，希望合大家胃口！
講完波經又講番個場，我問佢點睇香港用仿真草場打正式比賽，佢用半鹹淡嘅廣東話講：「領隊，呢啲場點可以同天然草比較呀，所謂好嘅場地，平坦踢起上嚟無變化，鋪得唔好嘅場都唔知傷咗幾多球員，英國或者歐洲一早有好多球會試過用呢啲場嚟操同試賽，但結果都係唔普及就一定有佢原因，只不過我知香港嘅天氣，地細人多，場地一向唔夠無計啫。」
不過，佢最後都加番句好話，佢話呢啲場其實俾啲上咗年紀、行住嚟踢嘅老人家或者剛學踼波嘅小朋友都唔錯，但職業球員跳躍急停轉身一定死，當然未必即刻死嘅，但日積月累，有傷就手尾長，長時間喺度踢仲可能加快掛靴！
文：本地職業領隊
識睇，一定係睇足英台【英波Live】：
http://soccer.appledaily.com
http://bit.ly/engballlive