恒隆地產（101）與中大數學系合辦嘅恒隆數學獎噚日舉行頒獎禮，著名物理學家楊振寧、數學家丘成桐、中大前校長劉遵義都有捧場，噚日咁啱係恒隆主席陳啟宗65歲牛一，唔知邊位仁兄咁有心，揀啱呢日舉行頒獎禮，等陳啟宗可以喺多位學術界名人包圍下過生日呢？
陳啟宗向來多偉論，佢噚日就向得獎學生建議，將來做數學家、科學家，比做生意人好，對社會嘅貢獻更大。佢話，雖然自己財富多過丘成桐，但智慧上嘅財富遠不及丘成桐。如果有機會再來一次，佢話會選擇走丘成桐嘅路，咁樣佢會更加快樂。
丘成桐教授都話，唔少朋友希望佢可以幫助子女入讀名牌大學，尤其係商科學院經濟系最受歡迎，部份學生就因數學成績不理想，而無緣入讀。數學對商科、理科同樣重要㗎。