新鴻基地產（016）大股東郭炳江位公子郭基煇（Adam）今年31歲，後生仔果然好動，佢唔止跑得，閒時亦會踩單車，嚟緊打算積極備戰，準備明秋落場，參加旅發局舉辦嘅香港單車賽。
向來低調、好少公開露面嘅Adam，啱啱喺本周日以黑色背心、短褲亮相，陪阿爸喺ICC參加跑樓梯比賽，令人眼前一亮。新地最近決定贊助明秋舉行嘅香港單車賽，作為主人家之一，據聞郭炳江與Adam亦都打算落場參賽。
呢項比賽屬於公路賽，暫定幾項賽事嘅起點都係喺中環IFC，最長超過40公里嘅賽事，由IFC出發，途經西隧、ICC、青馬大橋，然後掉頭返去IFC終點；另外有20公里同10公里賽。大小郭生應該就係參加10公里賽，即係由IFC出發，去到港島西隧口掉頭，返去中環IFC終點，應該好快踩完。