歐聯分組賽終於結束，當中比較多人討論嘅入球，就係謝拉特嘅罰球。因為大家都認為，呢球好可能係神奇隊長最後一個歐聯入球。講真，今年重返歐聯嘅利物浦（圖），應該都學到唔少嘢。
Lulu周圍嘅朋友，有唔少都係利物浦球迷，佢哋由上季尾嘅齊齊狂歡，到今季嘅黯然失落，每次同佢哋出嚟食飯，都見唔到佢哋上季嗰份朝氣。事實上，自己愛隊成績嘅起落，真係好影響球迷嘅心情。好似Lulu支持嘅大埔同阿仙奴，今季成績未如理想，都令到我好多個星期嘅心情變得好差。但球隊打得唔好，其實先係最需要球迷支持嘅時候。
支持球隊做好本份
所謂「貧賤夫妻百事哀」，呢句話套落足球隊身上，其實一樣咁啱用。因為大部份球隊如果成績差，球迷總會變得兩極化，部份繼續全力死忠支持；但有部份就會怪責個別球員同教練，而且仲會向身邊嘅球迷不停發放負能量，認為自己會比教練更加了解球隊。教練應該好似佢哋心中所諗咁樣排陣，否則就係教練固執之過。
其實一個教練團入面有咁多專門人士，佢哋手中嘅資訊都係最深入、最新嘅。只有佢哋先最清楚每個佈陣嘅原因，其實我覺得球迷只需要相信同支持球隊，戰術、調動就留畀教練負責啦！如果不停發放負能量，話要換呢個、換嗰個嘅話，球迷不如返去玩FM或者FIFA好過！
每有佳作博1:1
講番今個星期英超，身為阿仙奴球迷，當然想今個星期曼聯對利物浦會打和啦！雖然利物浦啱啱喺歐聯出局，但係球隊每每對曼聯都會踢出水準，好似上季就兩循環都擊敗曼聯。不過，曼聯嘅攻力始終有一定保證，所以今場紅軍未必可以贏到波，打和1:1就係最好賽果！
LULU
不懂踢波愛睇波