警方噚日喺金鐘清場，同一時間亦四圍拘捕激進民主派人士，立法會內大部份泛民議員、撐佔中名人、雙學亦齊齊留守等住被拉，完成整個公民抗命，但有政圈好事之徒同八方講，佢見皇上黃洋達都被拉，卻獨不見宇宙唯一民主派、教主黃毓民嘅出現！正當佢要鬧電子傳媒河蟹教主之際，八方立即叫佢咪亂怪人！
話說前兩日立法會議員收到秘書處畀議員嘅每日活動通知，發現當值議員嗰欄，寫咗黃毓民議員由12月10日開始放假，一直放到12月23日，如果計埋立會聖誕休會，教主真係放足成大半個月假，同「放假特首」狼英真係有得揮！
但最令呢個議員注意嘅係，教主放大假之日，就係差人清場之時，真係約定都冇咁啱！教主自然無法現身金鐘，帶領勇武派「抗爭」，更加唔使驚好似佢愛徒黃洋達咁，就算留喺屋企都被差人上門拉喇！
泛民落晒場孭罪責
當然政圈皆知，教主到時必定好鏗鏘有力地反駁外界，「我請假使Ｘ同你班人交代呀！你哋落地獄喇！」但連愛徒都被捕，教主卻咁啱唔喺度，肯定會畀人口實！有政圈中人同八方數手指，話白鴿黨卿姐、公文袋余小姐、工黨阿人、社記長毛、人力袁彌明等，成班泛民政黨嘅主席落晒場，唔多唔少怕俾人話縮埋，所以就算多佢哋一個唔多，都要企出嚟承擔公民抗命罪責，惟獨教主真係唔怕俾人講做逃兵，話放假就放假，果然係毓民最夠薑！
李八方
mailto:[email protected]