雖然被各界認定好打得，但政務司司長林鄭月娥都有弱項嘅。佢噚日出席「2014年恒隆數學獎」頒獎禮任主禮嘉賓，致辭時話自己數學只係中學會考程度，對住台下包括費爾茲獎得主丘成桐在內嘅一班數學專家，事前都做定功課，問吓老公同兩個喺劍橋大學讀數囝囝嘅「專業」意見，以免班門弄斧。
但呢班林氏數學「專家」似乎唔多信林鄭嘅數學天份，只係提議佢講吓同數學相關嘅電影就算，林鄭好聽話，最終揀咗講述關於患有精神分裂症但喺博弈論、微分幾何學研究獲諾貝爾經濟學獎嘅數學家約翰．納許為題材嘅《有你終身美麗》（A Beautiful Mind）等介紹一番作罷。