85歲嘅城中富豪呂志和除咗有間喺澳門經營賭業嘅銀河娛樂（027）之外，其實仲有隻嘉華集團（173），唔經唔覺明年係嘉華成立60年，剛好一個甲子，噚晚嘉華喺會展舉行周年晚宴，筵開過百席，同員工與賓客聚首一堂。呂志和與結婚62年嘅太太趙錦屏仲拖手進場，好sweet㗎。
戴住招牌賊仔帽嘅呂志和噚晚戴煲呔，打扮得好醒神，佢太太就一身紅噹噹，十分喜慶。
呂志和呢位本地老牌富豪當然有號召力，唔少城中名人畀面到賀，包括卓能（131）主席趙世曾、霍震霆帶埋阿仔霍啟山父子檔出現。就連作為競爭對手嘅澳博（880）執董、賭王「四太」梁安琪亦深入「敵陣」，單拖赴宴，佢同太子爺呂耀東嘅太太，仲有前高官馬時亨好好傾，似乎幾friend喎。
