皇家馬德里禮拜二歐聯4球大勝盧多格德斯，3日後即踢西甲，然後就匆匆起程前往摩洛哥踢世冠盃，或者見時間唔多，高層就安排禮拜三進行一年一度嘅聖誕午餐，陣中一班球星好似基斯坦奴朗拿度（C朗）、加里夫巴利（右）、占士洛迪古斯同卡斯拿斯等，齊齊盛裝出席。
唔知係咪夜蒲完唔夠瞓，抑或同班高層一齊，唔敢太放肆，我求大俠覺得班球星個樣好呆滯，就算對住鏡頭笑，都笑得好牽強，巴利仲要俾人影到私下玩手機；至於同班老細一齊坐嘅卡斯拿斯，更加笑都唔多笑；最識做都係C朗，識得對住鏡頭單眼，算係交足貨啦！
至於B隊教練施丹雖然唔見蹤影，但佢個大仔安素就夠威水，喺周三代表皇馬C隊面對死敵馬德里體育會C隊，射入奠勝1球，帶領球隊最後以3:2勝出，有啲父親嘅影子，唔怪得之前施丹仲特登調佢上2隊，睇嚟真係虎父無犬子。
識睇，一定係睇足英台【英波Live】：
http://soccer.appledaily.com
http://bit.ly/engballlive