過去幾日，A股坐咗兩日過山車後，噚日一輪好淡爭持後跌市收場，兩市成交總共唔夠8,000億元人仔。個市好似又回復平靜。早兩日先至話睇吓阿爺忍到A股癲幾耐，話口未完，嗰晚就出招，嚇到第二日散戶走難式逃亡，滬綜指單日轉向急挫超過5%。之前嗰日仲得意，無端端又傳政府透過國開行注資3,000億元人仔，個市由上晝跌超過1%，下晝又倒升近3%。咁嘅市，竟然無得炒即日鮮，可惜！
大陸個市一向係政策市，市場上的分析師講出一萬個理由分析後市走勢，都唔及阿爺講一句，不過一日話收緊孖展，第二日話注資，都唔知你想個市升定跌！阿爺呀！你出個政策出嚟，都畀我哋消化下先，一日一策，好難消化呢。
不過之但係傳嘅嘢，可以係真，亦都可以係假，傳收緊孖展，同近幾日中證監同新華社嘅股市「溫馨提示」方向一致，傳咗幾日之餘，聞說大陸券商近期孖展借到離晒譜，管吓唔出奇，所以嚟真嘅成數高。至於注資，鄙人唔敢話係假，但即使有注資嘅動機同誘因都好，時機上會唔會有啲唔係幾適合呢？
流氓