9.26學生衝入公民廣場，陳小姐已站出來，昨晚也在雨傘廣場度過最後一夜。她說不會以成敗得失去評價今次運動，「我哋所追求嘅真普選、民主，唔會一步登天做到，呢個係一個里程碑」；重要是下一步怎做，無論是激進、打游擊還是循序漸進的做法，「每一個都可以試，只要知道自己做乜，目標清晰」。
她昨重返金鐘感受這70多天的變化，「好多人一開始為咗保護學生，慢慢了解發生乜事，最後明白現時處境」。她希望曾留守的市民莫忘初衷，「唔好忘記感受過嘅人同事」。
「向上一代灌輸民主」
Aggie沒法忘記9.28警方施放催淚彈的那個傍晚，「（警方）無端端舉旗，冇耐就放催淚彈，好多人仲坐喺度，好混亂。到𠵱家都好記得呢一幕」。佔領75日，眼見人越來越少，對話、絕食等各種方法也做過，政府仍無動於衷，她說唯一可做就是留守到最後。
她坦言，有時感絕望，但相信運動未畫上句號，「今日（昨日）清晒都係未完結，我會繼續參與」。她認為下一步應將民主理念、真普選訴求帶進社區，灌輸給上一代人，「佢哋可能認為我哋搞事，但要諗吓點同佢哋傾」。
「希望學生改變政府」
葉伯不忿警察屢次向佔領的學生使用暴力，「我想嚟呢度支持佔領嗰啲人，好多學生受咗苦，兩個幾月要瞓地下瞓街，俾人打餐死，頭破血流，又拖住行，又第一次食催淚彈，全世界冇咁嘅事，啲學生手無寸鐵㗎嘛」。
葉伯已屆74歲，他不但有長期病患，聽力也不好，他擔心政府日後會對佔領者秋後算賬，「（警方清場）冇扑頭，之後我唔知會點樣，你知共產黨最叻就係秋後算賬。我希望學生可以堅持落去，一年唔得就兩年，兩年唔得就三年，將呢個政府改變！」
