喺大前屆有句成日用嚟形容利物浦嘅說話，今屆又可以攞出嚟用番，就係「低處未算低」嘞。因為紅軍今屆喺英超表現滑落，又啱啱喺歐聯出局，最慘係佢哋嘅新星史達寧仲因為嫌棄球隊嘅成績，遲遲唔肯續約。喺下周日聯賽大戰曼聯前傳出啲咁嘅負面消息，我求大俠真係替紅軍擔心。
周薪加至81萬仍嫌少
利物浦上屆重拾霸氣，仲幾乎奪得英超錦標，可惜今屆賣走蘇亞雷斯後，就全面回落，目前喺聯賽只係排第9，又啱啱喺歐聯出局；而佢哋雖然非正式咁對陣中嘅超新星史達寧開出周薪7萬鎊（約81萬港元）嘅5年新約，但呢名新晉英格蘭國腳就係因為擔心球隊嘅前途，所以用緊「拖字訣」。
紅魔或重簽維迪
畢竟，啱啱過咗20歲生日嘅史達寧，雖然目前嘅周薪只係2萬5千鎊，但佢𠵱家鬼咁吃香，歐洲列強如皇馬及巴塞等都吼住佢，加上佢好想繼續有歐聯踢，咁梗係唔同利記續約住啦！新星唔肯續約，超新星亦唔肯嚟，講嘅係下周先滿16歲嘅挪威中場馬田奧迪加特，佢早前到利物浦試訓過之後，就轉咗去阿仙奴，又話要行晒全歐洲嘅大場先作決定喎。
利物浦喺下周日作客曼聯嘅聯賽大戰之前，有咁多利淡消息，唔怪得之初盤係紅軍受讓半/一啦！講真，同利記比，紅魔呢排個勢就全面回起，聯賽5連勝，排名升上第3，仲有報道指紅魔領隊雲高爾已經同意甲嘅國際米蘭達成協議，會喺1月重簽前曼聯後防主力尼曼查維迪。
另外，曼聯仲獲得同巿宿敵曼城嘅幫忙㖭呀！因為藍月亮喺歐聯啱啱踢咗羅馬出局，據報因為咁，羅馬亦都唔打算再hold住陣中嘅荷蘭中場史杜特文唔放，所以雲高爾喺1月時，好有機會簽得心頭好。
識睇，一定係睇足英台【英波Live】：
http://soccer.appledaily.com
http://bit.ly/engballlive