最近換手機，又要將歌曲轉到新手機。其實我呢個年紀都好少再聽新歌，好多歌都跟咗我幾部手機，好似楊宗緯嘅《洋蔥》咁。《洋蔥》其中一句歌詞：「盤底的洋蔥像我，永遠是調味品」，同曼聯助教傑斯（左）真係幾貼切。
傑斯初出道已經憑俊朗面孔加上一把曲髮，喺左路千里走單騎，肯定係巨星料子。不過出道時，已經有大帝簡東拿雄霸球迷目光，到同碧咸左右雙翼齊飛，球會又似乎將重點放喺萬人迷身上；到碧咸離開，但曼聯購入C朗，好快又成新一代紅魔寵兒，傑斯甚至要串演進攻中場，讓出左路位置畀C朗。
上季傑斯做咗曼聯4場暫代領隊，取得2勝1和1負，成績算及格，當時甚至有名宿希望傑斯坐正。不過曼聯唔係史雲斯，管理層冇咁大膽，結果搵雲高爾做領隊，傑斯要做番助教。今季曼聯開季戰績唔好，傑斯仲幾乎做咗代罪羔羊，有指佢向雲高爾提供嘅報告唔夠全面，令雲高爾唔能夠全面了解對手，有意無意間講到傑斯都跣雲帥。
其實傑斯對曼聯嘅忠心，亦都令佢失去議價能力，好似之前韋根想搵傑斯擔正領隊，傑斯當然拒絕，唔排除之後有英超球隊都想打傑斯主意，但如果傑斯一心留喺紅魔鬼等坐正，唔怪得自己做咗洋蔥。
文：牽牛