冬蟲夏草，喺內地被稱為「軟黃金」，傳聞有抗癌、抗菌、抗病毒、補肺益腎等奇效，價錢由上世紀90年代每公斤幾千蚊，炒到近年最高50萬元人民幣一公斤。咁貴嘅嘢，內地有家叫「青海春天」嘅公司，前幾年好神奇地開發出蟲草口服含片，簡直如同印銀紙。
佢最近買咗ST賢成隻殼搞上市，點知喺上市前夕就俾人踢爆，公司賣3萬蚊一盒嘅蟲草含片，竟然驗出冇含蟲草素！大陸假嘢多好正常，但咁樣一路呃到中證監，就真係好誇張。
其實蟲草含片有問題，行內人一早知，但青海省政府一直保駕護航。2010年產品一面世，國家質檢總局就發通知，禁止用蟲草做食品原料。青海省馬上發通知，話該產品係中藥片。
2012年，中央再發通知，話蟲草粉不屬於中藥；青海省馬上話，呢隻蟲草含片係「試點產品」。
青海省政府不惜得罪中央，做到出晒面，擺到明就係背後有龐大利益瓜葛。
青海春天賣嘅蟲草含片，平均每克售價超過一千，已經豬籠入水。而家貪心到想撈埋股市，反而被人拆穿，真係唔知點收科。
李可強