呢幾年，羅渣士（圖）偷走咗利物浦一樣嘢，就係穩固嘅防守。佢用華麗進攻去做掩飾，一步步消磨賓尼迪斯時代防守硬朗嘅氣質。賓尼迪斯執教時，紅軍平均每場唔失多過1球，但到上季聯賽失成50球！
賓尼迪斯最後嗰季，即係09/10球季，利物浦38場失35球。10/11球季，鶴臣同杜格利殊先後執教紅軍，38場失44球，場均失1.16球。11/12球季，喺杜格利殊帶領下，38場失40球，場均失1.05球。12/13球季，羅渣士嘅首季，利物浦38場失43球，防守冇話特別差，但到上季，失球急升至50球，場均失1.32球。
今季頭12場聯賽，利物浦嘅防守力直線下滑，12場失18球，場均失球升至1.5球。就喺呢個危急存亡嘅關頭，羅渣士發現謝拉特唔能夠再踢防中，一係將隊長放落後備，一係就搵佢踢進攻中場。之前謝拉特踢防中時，好多時就佢拍住佐敦軒達臣，謝拉特體能唔掂，搞到軒達臣疲於奔命。𠵱家，羅渣士會用盧卡斯拍軒達臣或祖阿倫踢防中，至少兩個人都好氣好力，效果立竿見影，近3場聯賽只係失1球。不過，長遠嚟講，羅渣士需要買番個有級數嘅防中，中場硬起嚟，後防都會踢得輕鬆啲。
文：咖喱