點解曼聯有咁多傷兵？前助教菲倫就話，同領隊雲高爾（圖）更換體能教練有關。菲倫跟咗費格遜好多年，喺莫耶斯上任後被炒，雖然佢已經搵到新工，喺諾域治做緊1隊教練，但佢仲好關心曼聯嘅情況。佢特別提到，雲高爾將原來嘅體能教練史杜域打入「冷宮」，改用親信雲迪積，係紅魔傷兵不絕嘅主因。
菲倫話：「我同史杜域合作多年，佢好明白點樣保持班球員嘅狀態，同埋幫球員準備比賽，但曼聯今季突然調走佢，仲行另一套體能訓練嘅方法，影響就喺𠵱家出現。可能同訓練強度有關，操得強得滯，亦可能唔夠。」我求大俠呢幾年都好留意曼聯，其實季季傷兵都係咁多，究竟係咪體能教練嘅責任？大家自己判斷。另外，雖然咁多傷兵，其中新加入十字軍行列嘅基斯史摩寧要唞兩周，但雲高爾表示冇諗過喺1月買後衞，話𠵱家人手夠晒。
識睇，一定係睇足英台【英波Live】：
http://soccer.appledaily.com
http://bit.ly/engballlive