今屆四場國際賽，邊場港隊機會最高？梗係香港一哩錦標啦，自05年日本隊「三連冠」奪標後，近八屆都係港隊馬天下。今屆港隊更有匹黑衣巨人「步步友」在陣，可以話冇得輸。隻馬5戰1600米4冠一第二，亞軍之役只因排14檔蝕位無數，加上遇到南非馬王「繽紛會」，先至屈居亞軍。而上場乃休後第二戰，狀態仲未足，已能大勝「大運財」及「雄心威龍」。大摩近日接受訪問時講到明，「步步友」就算冇大進步，只要跑番上仗水準，喺國際賽已可橫掃；「雄心威龍」練馬師苗禮德亦滅自己威風，指出現階段嘅「步步友」，根本可於全球任何嘅一哩一級賽奪標。
當然啦，「步步友」叻啫，都要對手有缺點，先至冇得輸。「雄心威龍」近日蹄部受感染不良於行，能否上陣都成問題，而「大運財」無疑係上季最佳一哩馬，但廐主高伯新講過，呢匹馬其實最佳係1400米。至於上屆香港一哩錦標盟主「精彩日子」，話就話蓄銳出擊特佳，但畢竟已七歲，冇可能年年都咁勁。外隊馬方面，四匹日本馬喺當地只算二線分子，睇嚟馬主李福鋆可以繼2011年「步步穩」之後，再憑同主嘅「步步友」重奪香港一哩錦標。