「……個死老鬼明明有錢，死口咬定話剩下只餘棺材本，咁每個月政府發放的公援綜援呢？生果金呢？俾開我㗎嘛，竟然講大話，冇得俾？唔係我打佢，佢自己撞埋我對拳頭咋！」 蓮姨姪孫向警方申訴的供詞。
不是她自己報警，鄰居看在眼裏多年，蓮姨的姪孫不斷上門需索，終於演變動粗搶錢；忍不住暗中代報警求助。
不想再講這段痛苦經歷，上輩人認為家醜不外揚，再壞都是自家子姪，呵護是長者任勞任怨的天職，受不了我們不罷休，曣她才淡淡道出：
「 75歲不單止冇死，80、85歲都死唔去，真的沒想過活到今天90歲。本來儲備不算多，有餘錢都寄回大陸鄉下。97年樓價高姑婆屋賣咗，分了多少。又好運；獲派優惠孤獨老人的政府屋，總算晚年有瓦遮頭、有飯食、都有時飲吓茶，心滿意足咯。
公援？綜援？
13歲背井離鄉，來香港從妹仔做到管家，從來不靠人；靠自己，對手用來工作㗎，點好意思攤大手板望政府施捨？生果金當然要，個名好聽；當納稅人孝敬老人家一番好心。
63歲，東家闔府移民決定退休。本來主僕幾廿年，大家都捨不得，很想申請帶我一起移民多倫多。
再親，始終不是自己家人，香港還有好幾個姪子姪孫，鄉下已經沒幾個熟人，回不去啦；死在香港總算落葉歸根……」
煮完美味無瑕滑溜薑汁撞奶，蓮姨好客繼續包水餃。「 細佬落咗香港，死鬼咗咯，姪仔姪孫雖然沒一齊住，也常探望，算係咁啦。阿哥同大姪落唔到香港，都死埋咯；所以大姪孫來港特別照顧，時加接濟當補償。我們那代人，不要說自己子姪，見朋友生活有欠都盡量幫忙，姪孫可能真係有需要，拿不出？都係我唔好，招呼不周！」