十二月四日賓架R請老友食飯，梗係喺灣仔佳寧娜開餐嘅，賓架R係佳寧娜三十年老主顧，由大老闆至總廚至大堂經理，邊個唔識佢，是故佢在佳寧娜潮州菜宴客，一定冇失拖，冇佢嘅話，左丁山唔去咁遠食潮州菜㗎。
吃罷，各人各自乘車離去，只有左丁山行去駱克道落灣仔地鐵站搭地鐵返中環，行咗兩步就落雨，即刻掉頭倒轉行，上天橋到新鴻基中心去鷹君中心、中環廣場等大廈行去地鐵站，即使落大雨都唔會濕身。原來飯腳之一，昔年美國銀行中國區主管黃自強（Richard Wong）亦係咁行，同路上中環，傾到不同雜事，偶然問到：「有冇做過義工？」李察云：「教育工作囉，我係加拿大國際學校創辦成員之一，我仲係創校校董會（Board of Governors）主席，係1990年代初期嘅事，創校時期搵地方、籌款、招生、招聘教師、樣樣辛苦，好彩得到自加拿大回流嘅朋友大力支持幫忙，先至辦得成，後來又得到馬會捐巨款，政府撥地，就在南朗山道興建新校舍，至今有中學、小學學生千幾人，IB試成績非常好。加拿大國際學校依家叫做有唔錯聲譽、站穩陣腳，學校在新學年請咗一個資歷極好嘅新主管（Head of School），統率中學小學，學校向前走，更進一步，應無問題。」
據佢講，新校長叫Dr. Gregg Maloberti，取用了一個中文名字，就係馬龍戈博士，來頭幾猛喎，係長春藤名校University of Pennsylvania嘅教育學博士，在美國教書教過英文文法、文學、歷史、寫作，又在學校做體育教練教越野跑、壁球、足球、滑雪及網球，可謂文武兼備，來港前係紐約Ross School臨時學校主管，之前做新澤西州Lawrenceville School嘅收生主管（Dean of Admission）達15年之久。碰到一位馬會要員，係咁意問吓佢識唔識Lawrenceville，佢即刻講：「唔好講笑，香港好多名人希望送子女入呢間寄宿學校㗎！」於是上網一查，先知道此校創辦於1810年，校園有700畝，申請入學比率係逢十取一，學費在全美私校最貴，有大把著名校友，馬龍戈博士來自該校，李察黃話希望佢可以將加拿大國際學校提升到更高層次。