呢一場佔領運動，教育界邊個係人、邊個係鬼，大家有眼得睇！而對於特首狼振英嚟講，幫得佔領學生嘅，似乎就唔係好人；借佔領批評狼班子嘅，更加係衰人。據聞佢最近就為教育局局長吳得掂因為佔領運動受靶抱不平，批評港大校長馬斐森唔出嚟片戴耀廷。
八方聽聞狼振英上周閉門接見約60、70位人大同政協，聽佢哋講施政報告意見時，突然將諮詢會變成批馬大會，一講到佔領問題就上身咁款，不點名批評有大學教授、即係戴耀廷啦，唔返學教書成兩個月，但港大校長馬斐森，卻一直冇為此出嚟現身交代，反而要教育局局長吳得掂上立法會受靶，成日因為佔領運動被議員質詢，包括回應戴耀廷以匿名身份捐款港大一事，為吳得掂抱不平。
強調要「處理」教協
與此同時，向舉黃傘畢業生拒發證書套嘅浸大校長陳新滋，卻獲狼英爆Like讚有骨氣，又指「有校長」、八方相信係指科大陳繁昌，竟然話學生舉傘係有創意，其實唔多妥當，一次過片勻兩位冇反黃傘校長。狼英總結時仲話，目前情況，其實係因為教育界勢力分佈不勻，教協同教聯會員比例係九比一，強調呢個情況要「處理」。
教協底子厚、實力強，狼振英真係敢撼呢座大山？八方問過教育界立法會代表、來自教協嘅葉建源，佢話唔理解狼英發表言論嘅動機，但覺得問題非常嚴重，亦響起警號，因為教師應該可以喺唔受政治壓力左右下，自由選擇加入邊啲組織，質疑狼振英呢個疑似「柯打」，係咪都等同「施壓」？
李八方
mailto:[email protected]