大市快上急落好飄搖，港股A股化好似係一個事實，正所謂「中港金鐘罩」，開始的時候可能係一個牢不可破嘅招式，不過，有時驚個罩太剛強、太硬淨，搞到喺個罩入面嘅市場，就變成內傷咁五勞七傷。
如果真係有咁情況又持續嘅話，咁就非常大鑊，而家等緊嘅，就係有無多幾個活門（valve）去放咁啲氣，等佢做成嘅好處多過壞處，咁就very good！
三一國際要睇實
Prof J喺踏入12月，已經幾乎全面休息，因為要完成嘅deal，11月底已經完成，為自己喺工作上嘅回報（當然係花紅）打咗嗰底，不過，人馬座嘅我喜歡向上爬，要周圍去，2015年嘅規劃已經完成咗百分之六十，Prof J亦都要同支持我嘅朋友交代，所以2015年全面出動，喺媒體做多啲嘢。
喺《蘋果》寫過嘅股份中，前晚重溫過，其中豪特（6880）停牌了一段時間，已經收到風，話豪特大股東堅賣殼，但另外兩位股東就會繼續留低，若咁樣嘅話我有兩個諗法，數公仔紙，買家未夠數咁樣同小股東買就要畀誠意金，另外兩位股東仔，甘於「忍辱負重」嗎？應該會希望跟住有嘢睇，記得上交易所披露易睇實佢會有乜搞作！
喺近期有本雜誌吹捧支付股嘅板塊，我一早已經捉咗隻中國支付通（8325），手上有晒三大重要牌照（包括網絡畀錢、預儲卡同銀行卡），潛質有幾大，自然要諗吓！
最後，醒多隻三一國際（631）一個股權轉移嘅項目，要講確係浪費時間，重點有以下兩個：
（一）用1.94億元（以三一國際上市計）可以借得10億元，同時有免息借錢，爽！
（二）加咗業務，即刻新角度畀佢，都係嗰句基本因素畀咗你，但隻股行唔行又係另一會事，梗係要追住我嘅蜻蜓投資法啦！
徐燦傑
齊魯國際控股首席策略總監
本欄逢周四刊出