金融沙皇任志剛前得力助手陳民傑（Thomas），舊年1月開業嘅圓通公關顧問，經過兩年拓展後，今日將會細舖搬大舖，慶祝喬遷之喜。
佢兩名忠實兼極具份量支持者──前政務司司長唐英年同舊老闆任總，當然會親身撐場，兩位阿太亦會畀面到賀。
據聞，四洲集團主席戴德豐也現身支持，新公司繼續駐守灣仔，由駱克道搬過啲去咗分域街。
財經記者出身嘅Thomas，95年加盟金管局，離職前任該局傳訊總監，09年隨任總退休同日退下火線，輾轉走上創業之路。陳民傑與金融及政治beat記者老編，一向好相熟，相信今日佢間新舖，應該塞滿唔少傳媒人。
當前政情多變複雜，2017特首選舉又波濤洶湧，人民幣國際化香港亦要鞏固國際金融中心地位，睇嚟政經公關呢行生意，未來大把商機矣！