蔡東豪劈炮唔做精電CEO，佢老友龔耀輝（Ronald）咁啱有新動作，明日競選會計師公會會長一職。舊年佢就爆冷做副會長，陳錦榮就做會長，今年佢捲土重來，噚日仲向會員發放參選電郵，附一張黑白硬照。相中嘅Ronald坐喺辦公室，拎起橙色電話作沉思狀，咪話唔型。
會計師公會雖然有逾3萬名會員，但會長就係由理事會選出。Ronald一直提倡會員無理由無得選舉會長。雖然「只有21人有票，選擇面向全體會員，公開我競選會長的理念」，Ronald係「改革派」，今次佢對手係普華永道會計師事務所合夥人何超平，業內人士話估兩個都有支持者，難估邊個跑出機會大啲。Ronald以方卓如筆名寫專欄，同當時以化名「孔少林」爬格仔嘅蔡東豪老友鬼鬼，唔知佢今次參選，老友有冇做軍師幫下呢？