早前轉戰內地發展拍劇《仔大仔世界》嘅鍾一憲（Jason），幾個月前曾被指係「V煞奇俠」（新聞連結： http://goo.gl/fZuJbl ），都係話佢個樣變化甚大，由以往包包面，近年變成大眼V面，更搞笑嘅係Jason樣子竟被指與Angelababy相似，真係分唔清邊個打邊個呢﹗
其實Jason向來熱衷上微博，不時喺微博大晒自拍照，無論係着背心嘅、戴黑超嘅、或者下廚look等等，佢都樂於放上網與網民及粉絲分享。
昨日凌晨Jason又再貼自拍素顏照，同粉絲講晚安，其實張相又唔係話太特別，不過霎眼望落去，Jason個樣就被指與賭王何鴻燊四太千金何超盈有啲啲相似喎，佢哋都係大眼尖面，唔知Jason戴上長假髮後，會否變成孖生姊妹？
然後到咗昨晚9點，鍾一憲睇完本報嘅即時新聞，竟然真係up咗張戴假髮嘅自拍相，佢寫道:「香港的新聞真的來來去去都是那幾款，但我明白的。既然記者錯過了。我就滿足一下他/她看一下我長頭髮的慾望吧！就放一張給你欣賞欣賞，或可重温-仔大仔世界-第4集,何止照片，視頻都有得你看！爽吧。我媽咪其實也是長這個樣子咧」
見佢咁嬌俏嘅樣，真係「安能辨我是雌雄」!