幾時都話香港人至愛係磚頭，明星藝人都唔例外。好似好歌手謝安琪（Kay）就出名慳家，原來同好多香港人一樣，都係慳慳埋埋想買層樓。最近大埔中心20座一個實用面積315呎單位，就以350萬賣咗，土地註冊處登記嘅買家係謝安琪（TSE ON KAY），天下之大，大把同名嘅人，點知阿Kay噚日出席一場合，就直認個單位係佢買嘅，係買嚟畀屋企人住，認真廿四孝。佢自己就幾年前平價租住同區嘅比華利山別墅，唔通買埋同一區，方便互相照應？不過，即使屋企人唔用嚟住，用嚟收租，聽聞呢類單位每個月收租成萬銀，有成三厘四回報率㗎！
另邊廂，近排不斷傳出「鋒菲戀」嘅男女主角入市買樓嘅新聞，先有淺水灣道56號嘅雙號複式，後有香港仔深灣9號嘅2座頂層複式，個單位定價成億銀，但統統係傳聞未經證實。