【壹週刊】而家時興講「成功需『父』幹」，不過小宗認為，「成功需苦幹」仲喺一啲都唔老土，嗱，有辦你睇。零九年先開第一間店嘅點心鋪添好運，由四季龍景軒嘅點心師傅麥桂培（培哥），拍住前好彩酒樓師傅梁輝強（強哥）創辨。憑住一味「酥皮叉燒包」，五年間由深水埗店，開到去北角、大角咀、將軍澳等，今年更衝出香港，開到去台灣、甚至越南！
多勞多得，銀行戶口自然反映左出來。睇返土地註冊署資料，培哥同強哥未搞添好運前，只係報住深水埗福榮街舊樓、以及將軍澳居屋唐明苑。但就喺過去五年間，培哥竟然用咗九百多萬，買入長沙灣新盤海峰等兩個大單位。而佢拍檔強哥仲勁！不單用左六百幾萬，買入牛池灣樓盤峰弦單位，仲用左合共一千八百多萬元，買左將軍澳豪宅天晉共三個單位！做點心師傅都咁富貴，真係至威係你！小宗查過公司註冊處資料，所有添好運分店都基乎係培哥同華哥做大股東，兩人落手落腳密密做，無話有大財團support。小宗對呢種獅子山精神，又豈有不salute之理！
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁： http://nextplus.nextmedia.com/