【銅鑼灣】現年45歲的鄭嘉穎有型有款有事業，絕對是城中筍盤，近日有傳他與胡杏兒暗撻，又指佘詩曼醞釀與他翻撻，但全部皆是冇米粥，反而今年7月與他同遊新加坡，現時是他貼身助理的表妹王賢詠，工作以外都與他形影不離。
扮路人等候
上周四（4日）約傍晚6時，頭戴cap帽的嘉穎在銅鑼灣景隆街一間便利店買煙，本來以為只有嘉穎一個人，但原來其表妹王賢詠與他同行，只是站在門外扮路人甲等候，嘉穎買完煙後表妹緊隨其後，一齊走入後巷，嘉穎未有即時點煙，反而先走到巷尾查看有否人，確定沒有人才點煙，警戒心相當高。
飯後食多支
其間嘉穎與表妹不斷傾偈，一支煙時間後，兩人再到茶餐廳醫肚，不過整個晚餐頭尾都只是吃了20分鐘左右。飽餐後，嘉穎一馬當先離開茶餐廳，埋單交由表妹負責，之後二人走到另一條後巷享受飯後煙，非常合拍。
採訪、攝影：畢紹基
