香港政局風起雲湧嘅一年，雨傘運動佔據大眾心靈，YouTube公佈今年本港最熱爆影片，首位就被「蘋果動新聞」頻道嘅「9.28-30 佔中啟動Occupy Central Live Broadcast」佔領，超過336萬人次點擊觀看。
喜記老闆攬大髀排第３
排第2嘅係狼太唐青儀「親自」演繹嘅【一口'梁'氣-JFung Remix】Official MV，創作人Jacky Fung將狼太鬧中大學者蔡子強嘅短片，惡搞成1分51秒長嘅Remix版本，吸引近155萬人次欣賞。而狼太完美唱出「齊昕嘅母親無知涼薄，齊昕嘅父親冷血刻毒」嘅神韻，令佢力壓厚多士，「內地女人車箱（廂）食野（嘢）：『你厚多士』」短片只以近88萬點擊排第5。就連喜記辣蟹老闆廖偉文銅鑼灣反佔中時被指非禮嘅短片「03OCT2014反佔中人士衝擊銅鑼灣路障，攬少女大髀，鑽褲襠」都高過厚多士，以近138萬點擊排第3。第4位則係「孩子問︰誰還未覺醒」MV，小女童真摯演繹獲120萬點擊率。
呢次YouTube提供嘅排行榜，只統計香港境內嘅IP位址點擊，而YouTube影片網上顯示嘅觀看次數則係全球性，所以會出現排行榜位置較後嘅影片點擊率卻高於較前影片嘅情況。