今年浪琴表國際騎師錦標賽，結果由福永祐一封王，呢位日本代表憑第二、三關一放一追，勝出「海之濤」及「珍珠旺」起孖，頭關及尾關座騎「無敵劍俠」及「華美之寶」雖都三甲不入冇分，但佢最終仍能總分24分，力壓四關全跑二三名惟冇馬贏僅得20分之莫雷拉，個人歷史性稱霸呢項國際性賽事，亦繼04年憑武豊首度奪冠後，事隔十年日本騎師再次封王，而雷神雖未能繼前年後再做冠軍，但表現亦甚出色。
至於麥道朗，呢晚憑頭關「萬眾期待」勝出及尾關「天長地久」第二，以總分18分成為今屆總季軍。根據賽例，福永祐一、莫雷拉及麥道朗順序奪得50萬、20萬及10萬元獎金，福永祐一更獲名錶，賽後接受名模林志玲等人頒獎，福永祐一仲賣口乖，話久聞林志玲大名，讚佢真係好靚！
講番騎師賽尾關第八場三班一哩，麥道朗騎新勝馬「天長地久」採取放鳶戰術，眼看就要放到之際，英國代表莫雅夥拍時廐「新妙星」後發先至，將前駒超越爆出15倍冷W，粉碎麥道朗起孖與福永做平頭冠軍之希望，亦間接造就福永一舉擊敗雷神及麥道朗。
莫雅貴為天下第一高手，呢場大顯功架，久沉之「新妙星」在他胯下判若兩駒，打開今季勝門，亦成為今屆騎師賽唯一有上名紀錄之歐洲騎師。