咪以為拜仁慕尼黑個個禮拜贏波同季季捧盃就一定係筍嘢，隨時害你一世。我求大俠提醒各位家長，如果你哋唔想自己嘅小朋友變做港孩，千祈咪畀佢哋做呢間德國班霸球會嘅粉絲。
歷來贏咗24次德甲、17次德盃同5次歐聯嘅拜仁係德國最成功嘅球會，仲同英超車路士、西甲孖寶皇家馬德里同埋巴塞隆拿，被認為當今歐洲最強嗰4隊。但德國《世界報》撰文話，拜仁係「糖衣毒藥」，隨時毒害小朋友，令佢哋以為人生只有成功沒有失敗，而且乜嘢都係唾手可得。佢哋嘅主編拿斯禾洛特話：「各位家長千祈咪畀自己啲小朋友做拜仁球迷，如果佢哋要拜仁波衫做聖誕禮物，千祈唔好應承。」
撐弱隊先有得着
拿斯禾洛特咁反拜仁，原因係佢認為捧拜仁嘅小朋友眼中只有成功呢兩個字，永遠唔會知道乜嘢係世界艱難。佢話：「你要明白自己唔係活喺安聯球場，現實世界係好殘酷，你會同人鬧交、失戀或者搵唔到工，唔會好似拜仁咁樣樣都成功。」
拿斯禾洛特仲話捧弱隊先會令小朋友有得着：「拜仁個個禮拜都慶祝贏波，個個球季都慶祝攞冠軍，初時係幾過癮，但久而久之就好無聊好公式。捧拜仁係唔明智；相反捧科隆、漢諾威或比勒費爾德呢啲弱隊，反而可以培養出小朋友嘅性格。」拿斯禾洛特唔係第一個咁鬧拜仁嘅人，多蒙特教練高路普日前都咁講：「如果你淨係想要成功，麻煩你去捧拜仁。」
搵錢掟人犯眾憎
《世界報》同高路普咁反拜仁，或者你會認為佢哋眼紅拜仁嘅成功，但我求大俠認為背後嘅真正意義，係要向全德國作出控訴，拜仁為咗成功而不擇手段。講真，落場踢得波嘅，梗係想贏波同埋攞獎盃，想成功本身係冇問題，但問題係拜仁壟斷德國球壇，仲要賤賤格格、陰陰濕濕，成日以本傷人，用銀彈政策挖走其他球會嘅主力，好似近兩季就撬走多蒙特嘅馬里奧葛斯同埋羅拔利雲度夫斯基。
拜仁唔想喺德國繼續咁犯眾憎，真係要積吓陰德，凡事唔好去得太盡，所謂今日留一線，他朝好相見嘛。
識睇，一定係睇足英台【英波Live】：
http://soccer.appledaily.com
http://bit.ly/engballlive