有幾多富豪會發財立品？美國新鮮出爐嘅慈善捐款統計見到，「股神」畢菲特再蟬聯富豪慈善榜冠軍，今年捐款21億美金（約163.8億港元）。名單上第三、四位，係我哋香港代表，sorry唔係首富李嘉誠，而係恒隆地產（101）陳啟宗、陳樂宗，佢兩兄弟今年透過晨興基金會，向哈佛大學公共衞生學院總共捐3.5億美元。
做善事又點可以唔預誠哥？佢座右銘係「君子愛財，取之有道」，長和系市值過萬億港元，慈善捐款4,220萬蚊，佔比10萬分之4，真係多謝晒。香港其他大孖沙嘅上市公司，閒閒哋一年捐幾千萬乃至幾億出嚟做慈善，免稅之餘又可以幫到有需要嘅人。新地（016）算係最闊綽，最近捐款按年增加一倍有多，點解突然咁慷慨嘅；新世界（017）就捐咗1.24億，都唔少㗎。