坊間有唔少關於AE卡嘅傳說，那日IFC張智霖講嘅杯麵故事，睇完好似唔知邊度聽過咁。早排先有香港AE高層接受訪問，就話有個香港客，竟然叫搵AE去「死海」撈沙，等個寶貝女可以拎去同淺水灣嘅沙比較交功課。如果呢個家長真係存在，佢錫唔錫個女就唔知，我只係知佢好鍾意晒命。查實問下身邊啲卡主朋友，你就知AE冇大家想像中咁神。好似演唱會飛咁，冇位就冇位，點變個位畀你？網上就有個卡主講過，所謂嘅秘書服務冇幾可會用，要處理生活瑣事的話，除非係白癡，否則自己Google或上網搞仲快，冇必要兜個圈搵人幫。
至於嗰啲所謂AE「傳說」，根本冇人證實到，但推銷效果就好顯著！噚日港股有氣息，除咗國策受惠股外，仲有股仔落鑊。都市麗人（2298）代言人林志玲當然養眼，但大家睇志玲時亦可睇隻股。公司係中國一哥，但其實市佔率只係2.8%。競爭冇錯係好激烈，但正如大摩最近份報告講，公司攻二、三線城市策略成功，同店銷售增長由上半年得2%，升至下半年5%。公司亦已一早進駐多個網購平台，今年雙十一單單天貓當日已有八位數銷售。正正由於市佔率仍低，配合好嘅策略，未來可發圍、想像空間更大。另外，公司最近已悉數贖回可轉換票據，股份質押亦已全面解除，屬正面消息。股價噚日破頂，相信仲可以更上一層樓。
Fifi
http://www.facebook.com/lovefrystock
本欄逢周二、四刊出