狼班子將社會嘅問題，一面倒歸咎年輕人無得向上流，呢種睇法同唔少政界「紅」人意見一致，紛紛度出驚世好橋，想幫香港化解呢場風波，打救年輕人。牛仔褲大王、旭日集團主席楊釗喺呢方面有獨特意見，據知佢上周以全國政協委員身份出席施政報告諮詢會時，當面向狼英提出，不妨向年輕人大派十萬蚊助創業，至少有個向上流嘅機會喎。
到底係咪一個「錢」字，就可以搞掂年輕人嘅爭普選「意志」？八方不敢苟同，但若然政府真係落實此建議，相信又要一班大孖沙科水支持，楊釗身家厚唔介意，唔知其他富豪係咪一樣肯捐錢？
八方仲聽聞，另一全國政協委員莊紹綏當日一身紅衣登場，笑笑口話要幫特區沖喜。莊生呢一番苦心，盛傳睇到唔少在場人士眼甘甘。