唔理咩日子，落飛黨睇啱就出手，一於搵銀至上。呢晚資深馬主許晉亨之堂兄許晉義，出一對馬分途列陣，齊抽12檔衰位，表面唔好彩，不過第二場四班1200米之「特務飛龍」跑落卻由巫斯義化腐朽為神奇，12檔出閘火速切入走二叠，拍住放頭馬「澤心星」入直路，阿巫一騎順勢彈甩對手直奔終點，這匹文廐馬成功連捷。
「特務飛龍」最後五分鐘由10多倍落至5.4倍，啡燈W順利開出，落飛黨約落注180萬，扣本後進賬約800萬。至於韋達騎「萬醒駒」拉士衝上跑第二，13倍啡燈Q開埋，落飛黨肚滿腸肥，連埋中WIN，一共有過千萬落袋，跑第三則係「澤心星」。
「特務飛龍」之前由葉楚航同吳定強訓練過，跑咗兩季未入過三甲，今季轉投文家良變咗另一隻馬，贏完田草再贏谷草，五班升四班一樣掂，兩WIN由阿巫一手包辦，人馬合作保持不敗，做咗最佳拍檔。文家良亦指此駒贏在與巫斯義合拍，今仗成功克服外檔阻力，發揮出色，希望馬兒保持進度，加分後再有表現。