由動主播吉吉及Ah Gi主持嘅全新音樂節目《動樂搞》同大家見面喇！每個星期，佢哋都會同嘉賓玩餐飽，有時jam歌，有時傾心事，歌手、獨立樂隊、組合、獨立音樂人...統統都唔放過！
今集嘅嘉賓，係由發仔、歐陽、Showroom組成嘅新晉組合「新青年理髮廳」，佢哋出道短短一年，YouTube上嘅MV點擊已10萬計、Facebook專頁累積超過二萬個like、演出亦每每爆場。「新青年」喺節目中大談惡搞歌文化，更即場唱出心水惡搞歌《忘情釋迦舞》。被問到點解會選擇唱呢首歌時，成員發仔就話：「 有日收到蘋果動記者嘅電話，叫我揀一首惡搞歌，我哋又不太識喎，咪上網揾囉，然後聽到呢首歌覺得唔錯…」成員歐陽就表示：「改編歌詞比作一首歌更難， 因為要所有音準確，如果去作一首歌曲，可以用旋律遷就歌詞，比較有彈性。」
除此之外，「新青年」更挑戰《自己搞自己》環節，於限時內即場惡搞自己嘅作品。佢哋揀咗《總有陽光空氣》，唱出今次做訪問嘅感受，並且同兩位主持jam歌！