奢侈品生意唔好，本來唔係咩新鮮事，但上周五Prada（1913）公佈第三季度（8至10月）業績，還是嚇窒市場──單季核心盈利大跌近50%，遠差市場預期約20%。
聞說管理層在分析員會議上，死都唔肯透露期內同店銷售表現。有分析員自己估算，指Prada第三季同店銷售起碼跌緊10至20%，而第二季只是跌3%。反映Prada生意惡化的速度，已經到達危險水平。對於業績失準，Prada就解釋，由於香港10月有佔領運動，內地「豪客」失蹤，故拖累整體表現。
香港向來是奢侈品「集散地」，廣東道是旦一間名店，單月銷售都「億億聲」，所以話香港生意差，會拉低Prada整體業績，海迪都信，但係咪真的會差成咁？就當Prada香港10月一個手袋都賣唔出，零收入，對集團營業額的影響只會是4、5個百分點，但Prada第三季生意是跌緊8%，遠差過同業仍有單位數的增長。
與其說受佔中、外圍影響，海迪認為Prada要面對的，更多屬自身問題。例如集團過去數年，即使市況放緩，仍馬不停蹄每年開舖70、80間；其產品的設計和價格，亦越來越唔match。Prada話，未來會加推1、2萬蚊的產品來催谷銷情，並增加投資在宣傳品牌上。這兩項措施都意味着，集團的margin仍未跌夠。
Prada最艱難的日子恐怕仍未過。
海迪