近排內地券商全線極度唱好，預測目標話滬綜指衝上4000點，已經係最低消費。阿爺出手打壓，A股周二大插水，啲分析師自然要出報告解畫兜番。
其中以國泰君安首席策略師任澤平言論最矚目，佢噚日話，中央今次出手是「灑灑水，降降溫」，「快牛變慢牛是雙贏，暴漲暴跌是雙輸」。咦？佢之前報告仲話，「黨給我智慧給我膽」，霸氣無比，牛氣沖天，而家中央出小小招就縮沙，轉軚咁快，真係信佢一成都死。
呢位任生，背景相當之猛，之前擔任國務院發展研究中心宏觀經濟研究部副主任，今年5月過檔國泰君安，頭炮就係發表報告《論對熊市的最後一戰》，氣勢澎湃。
入面話，「中央打虎歸來後，出手打熊，5000點不是夢」。論據就係，「抒豪情，寄壯志，面對群山」，一大堆文革口號。
咪以為份報告係笑話，由於佢係第一個睇滬指上到5000點，喺內地被視為經典。
A股係政治市，通常券商策略師報告都以政治行頭，等你以為個個都坐喺政治局開會take notes。不過任澤平嘅成名作，連分析都唔使就可以爆紅，足證市況有幾癲。
李可強