雖則被讚疾風知勁草啫，但政治，永遠唔知下一秒有咩變化，難怪特首狼英請嘅家務員，都要識得執包袱啦！
話說成日搞內交嘅狼振英，繼8月招聘過四級家務員後，噚日又喺報章刊登廣告，招聘一名五級家務員嘅公務員空缺，月薪由1.2萬至1.5萬元，只要具小六學歷就符合求職資格，但就需要曾經喺大戶家庭、大型機構或酒店處理家務，具房務、處理食材相關學歷或工作嘅經驗，同時要負責活動場地佈置、支援及搬運等工作，仲要協助接待、侍餐同處理房務㖭。
最特別係呢位家務員嘅職責，除咗列明要處理嘅日常清潔工作，包括除塵掃拭、洗刷及護理雲石地台、地板、清洗地毯、擺設同餐具外，仲要接收同整理行李等。知否世事常變，狼英請定執包袱嘅熟手技工，未嘗唔係好事。
狼英亦先聲明，呢份工可能要超時、不定時同喺假期間工作，要着住制服喺禮賓府、粉嶺別墅同其他地方工作。由於職位屬公務員空缺，求職者都要通過《基本法》知識評核，試用滿3年後，有機會改聘為長工。