近年成日聽到有年輕人創業，但其實只要你夠醒目，打工一樣有出頭天，好似傳聞話明年上市嘅香港寬頻，自從2012年王維基將香港寬頻賣咗畀私募基金CVC後，公司引入一個新計劃，叫員工科水做股東，經過三輪注資，𠵱家香港寬頻已經有87位持股管理人員（Co-owner）。
跟阿里巴巴嘅合夥人制一樣，唔係你話做就可以做Co-owner，要經理級或以上先有資格。唔講唔知，喺呢87位Co-owner中，原來有兩位「90後」精英，分別係曾梓銘與石樂琦。
聽講，佢兩位做咗一年俗稱MT嘅見習行政人員後，2012年就升做經理（家陣係高級經理），當年一夠資格就馬上申請做Co-owner。
呢班Co-owner平均投資咗一至兩年嘅薪酬落公司，目前共同持有公司14%股份，將來CVC套現時，應該都係呢班Co-owner收成嘅時候。華華日前同香港寬頻財務總裁黎汝傑傾開上市問題，佢話無可奉告，但肯定唔用阿里嘅合夥人制上市。