聖誕節係同親朋戚友擦餐勁好時節，但有啲米芝蓮「美食」，只可觀賞，唔可以食落肚。尖沙嘴新太陽廣場今日起至明年1月4日舉辦《聖誕微型食品藝術展》，請嚟好有藝術潮流觸覺嘅新加坡微型食品藝術家Stephanie Koesuma（別名：Asuka Sakumo）舉辦個人展覽，整出精巧美味的微型食品藝術畀大家嘆吓。
1比12翻版縮小製作
八方噚日率先去用眼「醫肚」，大部份「美食」都係以1比12翻版縮小製作，《聖誕甜品系列》方面有「聖誕甜蜜糖果屋」、「甜美馬卡龍」、「趣緻冬甩」、「愛麗斯夢幻派對」，《家庭料理系列》則有「溫馨便當」、「暖笠笠火鍋」等。要數最有趣，莫過於同場展出香港米芝蓮餐廳嘅名貴菜式，等大家一日之內「試勻」全球名廚嘅手藝，包括「地道烤鴨」、名廚Gordan Ramsay首間喺香港開設嘅Bread Street Kitchen著名菜式「地獄廚神漢堡包及薄餅」等。
美中不足嘅可能係，食品中竟然冇近期熱爆嘅至潮菜式「人形龍蝦」囉！