現今球壇全季表現突出的球隊，季尾只有兩個命運：「被拆骨」同「拆人哋骨」。前者財力不大，靠個別球員着火、教練英明加上眾志成城下打響名堂，但季後通常就是被後者、財雄勢大的豪門，如皇馬、拜仁、曼城等肆意拆骨；而今季幾隊「被拆骨者」，在球季經歷3分1後，命運如何？
被拆骨拆得最徹底的修咸頓，不但冇做降班膽，在英超連輸3場後仍守在英超前5，領隊朗奴高文的功力和買人眼光令人嘆為觀止：上季入13球的射手列基林拔離隊，新兵加斯安奴柏利（圖）現已入了7球；少了上季交出6次助攻的拉爾拉拿，新兵杜辛泰迪治不用4個月已交出相同助攻了；左閘有賴恩貝特蘭代勞基梳爾；中堅有艾達韋列特代洛夫雲。至於有迪亞高哥斯達、菲臘路爾斯及泰拔高圖爾斯被拆走的馬體會，一樣於各個流失位置補入相應球員，球隊看似毫無影響。睇朗奴高文同施蒙尼帶波，就好似砌車咁易，炒到架車散晒？配番車頭玻璃執番度門再換過副「偈」，又行得！
咁點解只被拆掉「一條骨」的利物浦（雖然是主脊骨阿蘇），今季完全大跌Watt？單看進攻一環，去季紅軍倚賴的是快速壓迫、反擊及埋門把握力；今季「代替」阿蘇的巴神，出名把握力唔穩定、最興無波在腳時行住踢，跟全隊理念格格不入。人哋眼光獨到，配啲零件樣樣啱用；但羅渣士換「1件零件」都入錯貨！高下立見。
方柏翹
now足球評述員