時裝嘅嘢，遑論特首夫人，就連八方，都識條鐵咩。但好明顯喺點樣配搭方面，政務司司長林鄭月娥都有啲講究，雖然佢向來衣飾唔係好似狼太咁大紅大紫，但低調中都不時睇得出佢花咗唔少心思！
好似噚日佢出席社區投資共享基金社會資本動力獎嘅活動時，就喺同色系嘅套裝裙外面，披上一件駱駝色長身絨褸，腳踏一對啡高踭長靴。露出一對小膝頭哥嘅佢，不時笑瞇瞇，望落有啲少女味！
而查實呢件大褸，佢喺月初出席日本天皇誕辰慶祝酒會時都着過嘞。可能因為當日出席嘅活動既官式又隆重，所以佢用呢件大樓，配襯一件旗袍以及一對高踭鞋，感覺上比較斯文高貴，同噚日嘅look截然不同。
一褸兩種着法，變出唔同風格。查實時裝配搭，可以如此簡單。狼太係時候捨棄不平凡，重歸平淡。