保利達（208）經過近三季緩慢調整後，又挨到近兩年橫行嘅鐵底，睇位兜轉。保利達啱啱呢個月頭宣佈，旗下哈薩克斯坦油田獲當地政府延長生產期，消息公佈後，冇乜刺激作用，因為保利達大堆頭唔係呢壇製作，而係喺澳門靚仔房產項目度。
短炒博賺35%
先睇數據，保利達揸住位於黑沙環新填海區兩幅地，應佔樓面面積770萬平方呎。過去兩年，集團喺澳門預售銷售額，超過100億元，等緊入賬。又澳門樓市喺今年第三季打後，受到博彩業調整影響，都出現價量調整。但要咁睇，根據澳門統計局數據，去到今年8月，澳門居民存款4,790億元，非澳門居民亦高達2,320億元，創咗近年高位。
又據美聯統計，明年同後年，澳門落成樓盤得4,365伙，睇到嘅係，澳門居民水源充足，但樓盤供應繼續僧多粥少，隨住博彩業回穩，加埋阿爺嘅放寬政策，對澳門樓市會係強心針。
更何況，保利達樓盤，正正喺港珠澳大橋嘅落腳點，有呢個超級優越地利因素，好有機會一推售，又為保利達再回籠過百億元銷售額。咪扯咁遠，保利達家陣市值得47億元，單係已預售金額，已經係集團市值2.3倍。
真係好保守咁計吓條數，已預售項目為保利達每股增值0.66元咁大把，保利達NAV上到3.15元，現價（1.06元）折讓，係講緊0.35倍。又保利達阿媽九龍建業（034），揸保利達去到幾乎爆燈水位（73.4%），亦諗到，澳門物業一入賬，保利達點都會派大息，回饋大小股東。
呢轉趁保利達調整，嚟一轉短打，吼實近兩年橫行鐵底1蚊水平兜底，上番橫行頂1.35元，潛在回報率35%，PB先得0.4倍，未有耐升過籠。
錢雋
細價股專家
本欄逢周二、三、五刊出