噚日本欄提及，王菲次次感情有新進展，A股就大升。上周末鋒菲港聚，周六重演世紀拖手，A股周一果然暴升。
不過，亦有股民心呼不妙，事關劉嘉玲喺周日生日宴會，王菲單拖赴會，似乎有暗湧，結果A股昨日真係跌鑊金。
其實喺禮拜一滬指破三千點之後，A股幾乎所有明燈都着晒，心水清嘅股民，完全有機會喺噚日上早升市時跳船。
A股最亮盞明燈，叫「滬指萬點論」。2007年10月全行唱好，滬指會破萬點，結果股市開始暴跌。噚日網易財經開咗個「我在萬點等你」嘅專題，數晒近期唱好滬指萬點嘅券商、股佬言論，真係燈到爆。
另外，號稱「民間股神」嘅林園，亦係出名燈神。佢話自己開始由8,000元炒股，賺十多億元，2007年狂出書，sell名下基金，股市爆煲後俾人話「騙子」，呢幾年已經消失內地股壇。禮拜一出嚟講番嘢，話明年滬指至少破6000點，結果股市即爆。
當然，最燈嘅係，噚日內地四大證券報，包括上海證券報、中國證券報、證券日報、證券時報，全部大合唱，話股市現正處於牛市的階段，真係燈到冇朋友！
李可強