國際騎師錦標賽即將上演，12位參賽騎師亦到齊香港，呢日喺跑馬地馬場會見傳媒，為賽事造勢。馬會CEO應家柏等高層當然有出席，而無綫靚女宋熙年就做M.C.。12位騎師喺海報上簽名，準備送畀馬迷，而馬會每年都會製作唔同紀念品，送番畀騎師，今年就做咗一批騎師手套，手套上印各位好手所代表國家或地區嘅圖案，一班靚女Model做佈景板，由應家柏逐一向騎師送出。
呢批騎師名氣大嘅關係，好多靚女Model喺活動完畢，都捉住佢哋玩自拍合照留念。其中一位低胸港女Model非常風騷，捉住兩位本地代表雷神同華將一哥何澤堯，嘟晒嘴放電，大送美色，搞到雷神暈得一陣陣。
參賽騎師中，日本騎師福永佑一同賽馬事務執行總監利達賢，咁啱都係今日生日，佢哋互相祝賀之餘，福永佑一又話自己唔係第一次參加香港騎師賽，對快活谷有一定認識，有信心交出佳績。而上屆冠軍麥維凱，表示初步睇過自己座騎賽績，認為「至尊飛星」同埋「名馬」都有爭勝條件喎！