唔好以為NBA球員雄赳赳就一定好硬淨，其實唔少都係性情中人。好似巫師後衞禾爾，周一領軍主場經雙加時，以133:132險勝塞爾特人後，接受訪問嗰陣就喊出嚟；因為難捨6歲朋友仔剛因癌病過身。
禾爾上年喺網上認識患上淋巴癌症嘅小女孩美雅（Miyah），雖然美雅因為化療甩晒頭髮，但仍然好堅強；佢其中一個心願係見見女歌手Nicki Minaj，結果禾爾今年4月幫佢達成心願，兩人仲成為好朋友。不過周一早上，禾爾就收到美雅因病逝世呢個壞消息，但強忍哀傷心情完成比賽，仲交出26分同17助攻嘅悅目數據，協助巫師雙加時後險勝1分。不過到賽後訪問，禾爾就忍唔住男兒淚：「我希望佢可以安息，亦希望佢嘅家人能度過傷痛。」真係聽到都眼濕濕。
講完傷心事，其實場波都有開心嘢，巫師前鋒皮雅斯對住母會都冇留情，攻入28分，到第3節佢射入罰球後，超越咗米拿，升上NBA累積得分榜第16位，𠵱家累積25,300分。
識睇，一定係睇足英台【英波Live】：
http://soccer.appledaily.com
http://bit.ly/engballlive